الخميس، 26 يونيو 2008
أروى مصطفى صلاح.. واااااااااااااااااااء
الثلاثاء، 24 يونيو 2008
فكرة
يوسف محمد يوسف خرج و الحمد لله من المستشفى
الاثنين، 23 يونيو 2008
حبيابنا الطالباوية.. أبو سليم الكبير
الطالباوية معاً حتى باب الجنة
حبايبي الطالباوية وحشني مووووووت ، الله يكرم صاحب الفكرة ويجزيه خير الجزاء ويفرح قلبه زي ما فرح قلوبنا كلنا باللمة الحلوة دي.
أد ايه الواحد فرحان انه بسهولة شديدة و بمجرد ضغط زر واحد يقدر يعرف أخبار حبايبه وعشرة عمره اللي انقطع عنهم كتير بسبب الشغل وزحمة الحياة. أنا أخر أخباري تركت الشغل اللي كنت فيه واشتغلت مدير مبيعات فى شركة هولندية - فرنسية فى مجال تاني خااااااالص غير الدواء ( الأغذية )منتظر فرج ربنا كما تعلمون ( ادعوا الله أن يرزقنا ) !!!!!!!!
شفا الله يوسف محمد يوسف وعفا عنه ، ألف مليون مبروك لأحمد عبد الحميد ولده حمزة ، وحشتني جدا يا حيدرة ، دريني وسليم إليكم المفاجأة كما بالصور. مامادوا أخبارك ايه مع الوظاويظ السودانيين..... ؟؟ الباهي !!!!؟؟؟ ليه كدة ، الباقى : فى التدوينة الجاية
حبايبي أسأل الله أن يجمعنا فى الجنة
سلام عليكم
وليد الحداد
هو ده الكلام
الله يرحم العدس والعسل الاسود والجبنة
عيد ميلاد سعيد رودى
اليوم بفضل الله و منته يوم ميلاد الامورة الصغيرة و ابنتنا المصونة رويدا فى 23/6/2006 و بفضل الله تمت عامها الثانى و هى فى احسن صحة و الحمد لله و سمعنى احلى اغنية بهذه المناسبة " يا بنت المصون انت نور عيونى "
هذا اجدد خبر عندى بعد موضوع سفرى - و بصراحة ما اخبيش عليكم انا لسه لم اشترى هديتها و محتار اجيبلها ايه ؟ فأى حد عنده اقتراح فليتقدم به بس يخلى باله اننا فى اخر الشهر يعنى اللى هيقول عربية و لا شقة على النيل او حتى عريس يبقى يوفر كلامه لكن خلينا فى المعقول
طبعا رويدا يسبقها فى السن و لكن بشهور قليلة رزان مصطفى و جنة سليم و مريم الليثى و جنة سيد شحاته حيث تمت ولادة البنات جميعا ما شاء الله فى سنة واحدة و فى اشهر متقاربة فكانت البداية بمريم الليثى فى 9/1/2006 و النهاية برويدا فى 23/6/2006
بارك الله فى البنات و خيركم من بكر بأنثى
اخوكم / محمد سنوسى
نسألكم الدعاء
نسألكم الدعاء له ولكل مرضانا
الحقيقه دلوآتى الساعة الواحده صباحاً كنت بكلم محمد علشان اطمئن فمردش على تليفونه فكلمته على تليفون زوجته ولقيته هو وزوجته صوتهم مش طبيعى ويبدوا عليهم الارهاق والقلق الشديد...وطبعاً يوسف عنده حوالى 3سنين ونصف وعمار اخوه الصغير عمره حوالى 6 شهور وكلهم قاعدين فى المستشفي ، ومحمد قالى انه هيروح لوحده دلوآتى.
انا الحقيقه حاسس ان محمد وزوجته محتاجين دعاء كتير ومحتاج حد يقف جنبه فقعدت افكر ممكن اعمل ايه فلقيت زوجتى بتقولى بسرعة اكتب فى المدونة فجريت على الكمبيوتر وكتبت الكلام ده من غير ما افكر كتير
الأحد، 22 يونيو 2008
كله ده كاتمينه في قلبكم!!
من اخوكم أحمد مصطفى
اخوكم لسه جاهل بالمدونات اعذروووووووووووووونا
اخوكم احمدمصطفى
رسالة شوق وحنين الى الطالبويين
السبت، 21 يونيو 2008
اخواتى الاحباب انا بخير فهل انتم بخير
الجمعة، 20 يونيو 2008
شكر وتقدير ...وعرفان بالجميل ...واعتذار....وشوية حاجات تانية
لكل من شارك بالتفكير او التنفيذ او التدوين فى هذه المدونة والتى نأمل ان تكون اول وسيلة من وسائل التغلب على ما يحيط بنا من معوقات وعقبات بتعطل تواصلنا مع بعض ، حتى لو الاماكن بعدت والاجساد افترقت ، وكمان تقدير كبير لكل من يساهم فى انجاح هذه المدونه وتحقيق هدفها
ثانياً :العرفان بالجميل :
لكل أهل الطالبية وأخص بالذكر كل من له فضل مباشر عليا من اللى فى نفس سنى واللى اكبر منى واللى اصغر منى ، وطبعاً مش عايز انسي طنط ام أحمد جارتنا (الشهيره بام بلبل) ، وكمان طنط ام فريد ووحيد ومريم جارتنا التانيه (مرات عم جرجس).
الاعتذار :
الاعتذار عن التأخر فى الكتابة فى المدونه بسسب ان امور الشغل كانت ملخبطه من ساعة غزوة ام درمان الشهيرة (هكتب عنها بعدين ان شاء الله) ولكن الحمد لله الامور بدآت تظبط ، ولكن لعل هذه الظروف جعلت معظم اخواتى الكبار(سنا ومقاماً) السكان الاصليون والمهاجرون الاول الى الطالبية يسبقونى (كالعاده)الى المدونه.
اخر اخبارى :
بعد ما خلصت كلية تجارة القاهرة (محاسبة) درست ادارة اعمال فى نفس الكلية وكنت بدأت اشتغل فى المحاسبة ، وبعدين نقلت على المبيعات ، وبعدين اشتغلت بعد سنتين فى المبيعات الدوليه جوه شركة بتشتغل فى مجال تكنولوجيا المعلومات وسافرت دول كتيره خارج مصر ، وطبعاً كسبت فلوس كويسه (مما هو جدير بالذكر انى اتروقت فيها وبعض فلوس الاهل والاصدقاء معايا) ، واتجوزت سنة 2004 وسكنت فى الطوابق وتقريباً من قبلها بسنة كانت علاقتى بالطالبية بدأت تضعف قوى ، وبعدين العلاقة شبه انتهت بعد كده بحوالى سنه لانى نقلت السكن والشغل بشكل كامل (وطبعاً اتكسر ورايا عدة قلل متتالية)، ولكن كنت على تواصل شخصى ببعض الافراد القريبين جداً من قلبي وعقلي ، وبعدين حصلى ازمه مالية وبعت شقتى ومعظم الحاجات ذات القيمه الماديه فى حياتى ، وحليت مشاكلى كلها الحمد لله ، وانتقلت فى العمل بين عده شركات ، ودلوآتى انا فى السودان انا وعائلتى (زوجتى وعبد الرحمن ومعاذ) ، بعمل ايه وعايش ازاى احكيلكم التدوينة الجايه ليا ان شاء الله .
ملحوظة :
يوسف محمد يوسف (ابن اخويا جوزيف طبعاً) المقيمين فى حفر الباطن فى السعودية بيعمل عملية اللوز النهارده وهو تعبان شويه ودرجة حرارته مرتفعه ، نسألكم الدعاء ، تليفون محمد يوسف هو 00966502191768
الثلاثاء، 17 يونيو 2008
بلد المليون شهيد
اخر اخبارى انى و الحمد لله استلمت عملى الجديد بشركة التنمية العمرانية و ان شاء الله مسافر الجزائر اوائل الشهر القادم
دعواتكم بالتيسير و كده يبقى فتحنا فرع جديد فى بلد جديد و هى الجزائر عقبال كل الوطن العربى و بكده زى الليثى ما بيقول يتفرق دمنا بين القبائل
لى طلب اخير الا و هو التعليقات نرجو من كل طلباوى ان يعلق على تدوينة اى واحد كتب اخباره حتى نساهم جميعا فى نجاحها و حتى يتم التواصل
اخوكم / محمد سنوسى
الاثنين، 16 يونيو 2008
اللمة الافتراضية احسن من مفيش
تحية من القلب لعشرة العمر
اخواني الاعزاء ............. شكرا
الفكرة رائعة وجميلة جدا لوصل حبال الود التي انقطعت او تكاد بسبب السفر ومشاغل واعباء الحياة
والله واحشني كلكم جدا وبتمنى ولو ساعة نتقابل ونقعد مع بعض زي زمان
طبعا اللي انتو شايفينه في الصورة ده خداع بصري انا ارفع من كده بكتير في الحقيقة بس الكاميرا كانت بايظة تقريبا :)
انا اخباري الحمد لله بخير .... بعمل حاليا مهندس في شركة تطوير وتمويل عقاري بدبي .... وان شاء الله هنزل اجازة في شهر اغسطس
اولا .. اخي محمد عبد الوهاب مبارك الزواج السعيد (بارك الله لهما وبارك عليهما وجمع بينهما في خير)
ثانيا ....... مبروك يا ابو حمزة ويتربى في عزك (طبعا مش هوصيك عالتربية لان انت تخصص اطفال .... )
ثالثا ... مش عارف اكتب حاجة من جنا اللي مسحت الكلام مرتين قبل كده وكل ما اخد الكمبيوتر واروح بيه في حتة تيجي ورايا بالمشاية وتدوس على الزراير
اخوكم مصطفى الباهي
الطالباوية .. اجدع ناس
فعلا كان نفسي من زمان في حاجة تجمعنا على طول بعد ما فرقت الايام والبلاد بينا
دايما والله يا جماعة بافتكر مواقف كتير اوي كانت بينا .. ايام سهرنا فيها سوا او خرجنا فيها مع بعض او رحلات او او ..
دايما بافتكر ايام الجامعة والشقاوة
الواحد فعلا كل ما بيبعد عنكوا بيحس انو مات وروحه بترجع له لما بيكون بينكم
اتفق مع كلام اخونا الاستاذ ايمن جمعة ان كل حاجة كويسة اتعلمناها وعرفناها وفهمناها كانت في الطالبية
قابلنا ناس كتير وشفنا كتير بس لحد الوقتي عمرى ما لقيت الروح اللى لقيتها في الطالباوية
ربنا يبارك فيكوا ويجمعنا في الدنيا والآخرة .. آمين يارب
اخوكم / عماد سيد (masrawy.com)
طلباوية 100 100 أبو سليم الكبير
مبروك يا أبو حمزة وربنا يباركلك فيه ويخرج من الحضانة ان شاء الله على خير.
يا ريت ننشر المدونة دى بين كل حبيابنا الطالباوية عشان نطمئن على أكبر عدد منا. أما عن أخبارى أنا بخير والحمد لله امبارح قدمت لبنتى فى مدرسة بعد طول عناء من البحث - فى طريق المنصورية - بتاعة حد من حبيابنا ولسه أول سنة ليها السنة دى اسمها Trust لو حد عايز يقدم من اللى قاعدين فى الهرم وعايز تفاصيل المدرسة يبعتلى وانا ادله.
سلامى لكل الحبايب اللى حاضر واللى غايب وعلى وعد بالتواصل ان شاء الله.
أخوكم/محمد سليم ( أبو سليم الكبير)
طبعا هاتسالوا مين ابو حمزة ده اقولكم / احمد عبدالحميد
لقد استقبلت الطالبية فجر يوم الخميس الموافق 2008/6/12 السيد المبجل حمزة احمد عبدالحميد بعد عناء شديد وسهر ليالي وعذاب بس الحمد لله اخيراً شرف المحروس لكن نسالكم الدعاء له لان حالته صعبة شويه وهو مازال في الحضانة فادعولوا ربنا يسلمه من كل سوء
اخوكم / أحمد عبدالحميد
السبت، 14 يونيو 2008
أ/ أيمن.. ومصطفى.. وأنا.. وأنت :)
مش قادر اقولكم الفكرة دي جميلة أد إيه خصوصا اننا اتفرقنا في (الرياض- الخرطوم- الكويت- قطر- لندن- دبي- أبو ظبي) والبقية تأتي وربنا يسهل ونتوسع في كل مكان.
المهم أول حاجة هاكتبها هو موضوع من مراسلنا بقناة الجزيرة أ/ أيمن جمعة وعلى فكرة هو ليه تقرير هيتذاع النهاردة الساعة 6 ونصف مساء على قناة الجزيرة
وأترككم مع نص موضوع مراسلنا:
( السلام عليكم..
اولا خبر المدونة ده هو أسعد خبر سمعته النهاردة.. فمنذ الفجر ونفسي تراودني بأن أكسر دماغ الواد عمر (ابننا الكبير وهناك ايضا جحش صغير اسمه علي وهو ليس باقل اجراما من عمر).. المهم كنت حاكسر راسه بالهونه بسبب شقاوته وعفرته. المهم .. ما علينا فكرة المدونة هايلة.. وربنا يوفقكم.. ومصدر سعادتي أن الطالبية لها مكانة عظيمة في قلبي ولسكانها أكن كل الود والحب.
ففيها ومع أهلها اتعلمت جوهر الاحترام والجدعنة وأن الانسان بتربيته مش بمركزه كما تعلمت اولى خطواتي لمعرفة الله.. صفات دائما ما أرددها كلما التقيت فيه صدفة باحد احبابي من الطالبية
ومش عارف حتصدقوني ولا لاءه..فانا احيانا أعتقد ان كل صفاتي الجيدة اخذتها من الطالبية وكل صفاتي الوحشة اكتسبتها بقرار سيء اجبرتني عليه ظروف زواجي بالابتعاد عن الطالبية.
تحياتي لاحب بقعة في مصر الى قلبي
أيمن جمعة - قناة الجزيرة)
وبجد انتهى تعليق استاذنا أما بالنسبة لأخباري فحاليا لسه في القاهرة عشان في مشاكل في فيزا العمل الخاصة بي في القنصلية السعودية فعاوز دعواتكم يا طالباوية.
وخبر تاني ان مصطفى صلاح هيسافر النهارده الرياض ان شاء الله على طائرة الساعة 7 مساء.. وان شاء الله يوصل بالسلامة
انتهى موجز الاخبار السريع... ونتقابل في موضوعات تانية ان شاء الله
From Anas Helmy
الاثنين، 9 يونيو 2008
حفل زفاف اختى
محمد سنوسى
الخميس، 5 يونيو 2008
ابو اينو
ازيكم يا غالين
وحشتونى جدا جدا, و قبل ما ابدأ و اقول اى شىء لازم اوجه الشكر و التقدير لصاحب هذه الفكرة الجيدة جدا و من ساهم فيها .
كمان حبيت اكون اول واحد يكتب تعليق مجرد ما عرفت بالموضوع, سلامى الى جميع و الى من سيقرأ التعليق من شباب الطالبية الاعزاء , فعلا مع الايام و مع الانشغال و نتيجة سفر الكثير منا و نتيجة تغير مكان السكن للكثير اعتقد ان التواصل قل كثير عن ما سبق.
اتمنى ان تكون هذه المدونة بداية جديدة لنا من التواصل والاطمئنان على بعض.
اخوكم
ابو اينو
محمد الدرينى
الثلاثاء، 3 يونيو 2008
تعريف
و على كل واحد منا ان يدخل فيسجل فيها اخباره و كيف حاله فيطمئنا عليه و يطمئن علينا و لا مانع من اضافة صورة له او لابنه او ابنته او اضافة مقال اعجبه او خبر قرأه مع التحذير من وجود اى شئ ينوه عن الاتجاه او الفكر فهذه المدونة لا مجال فيها لعرض اتجاه معين او فكر معين بل هى لنا فقط اخبارنا و احوالنا و مستقبلنا ان احد اراد المشورة او الاسئناس بالرأى
ايها الاحباب .... نحبكم فى الله ونرجو من الله ان نتقابل فى هذه المدونة على الحب