السلام عليكم
ازيكم يا طلباوية
ما تتصوروش انتو وحشني قد ايه، ووحشاني ايام زمان الجميلة اللي ماتتعوضش.
فاكرين يا جماعة لما كنا بنقضي مع بعض وقت اكتر من اللي كنا بنقضيه مع اهلنا.
فاكرين لما كان فيه ناس متضايقين من قعداتنا الطويلة مع بعض وكان بيحاولوا يفرقونا عن بعض، وكان العقلاء بيقولولهم سيبوهم يشبعوا من بعض، بكرة الايام تفرقهم، واهي الايام فعلا فرقتنا، شوية في الامارات وشوية في السعودية وشوية في السودان وشوية في الكويت وقطر.
ده حتى القلة المندسة اللي ما زالت صامدة في مصر بقوا موزعين بين مناطق متباعدة وبيشوفوا بعض كل سنة او سنتين مرة.
لكن الحمد لله انه هدانا للفكرة الجميلة دي، واهي "اللمة الافتراضية على النت" احسن من مفيش.
عاوز اطلب منكم 3 حاجات
اولا: نبلغ اللي لسه معرفش بموضوع المدونة دي زي سيد شحاتة ود. عمرو عبد الكريم وكرم السيد ومحمد السيسي وحمدي السيد وايمن فاروق .
ثانيا: ندعي لبعض بظهر الغيب وانا عن نفسي بادعي ربنا انه يجمعنا في الجنة بعد ان فرقتنا الدنيا.
ثالثا: عشان خاطري، اللي يكتب تدوينة يقول فيها اخباره ماينساش يكتب اسمه في اخرها، انا مش هاسيب شغلي واقعد اراجع وراكم (ههههه).
أخوكم أحمد الليثي
هناك 3 تعليقات:
ربنا يكرمك يا ابوالليثي
مامادو
حلاوتك يا ابو مريم هو ده الكلام فكرتنا بايام جميلة و معانى اجمل و كلام ناس ياريت نراعيه احنا مع شبابنا و نسيبهم يقعدوا مع بعض و يرتبطوا ببعض لو تفتكر ان العقلاء اللى كانوا مؤيدين صحبتنا و قعداتنا كانوا فعلا حاسيين اننا فعلا بنحافظ على بعض . جميلة تدوينتك و على فكرة انا ارسلت الى محمد السيسى لكن لو شفته كلمه و قلت لحمدى لكن مش اعرف ميله كل دول تبعك يا نجم
بص يا ليثي في حاجة في نفسي بصراحة، لو ما كتبتش السطر الاخير ما تبقاش الليثي :)))
أحمد سليم
إرسال تعليق